ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន អនុញ្ញាត្តអោយតំណាងសារព័ត៌មានវៀតណាមចំនួន ៤ អង្គភាពប្រចាំកម្ពុជា ចូលជួបសំដែងការគួរសម និងជូនពរក្នុងឱកាសចូលឆ្នាំថ្មីប្រពៃណីជាតិខ្មែរ
ក្នុងឱកាសអញ្ជើញចូលជួបសំដែងការគួរសម និងពិភាក្សាការងារជាមួយ ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន នៅព្រឹកថ្ងៃទី០៧ ខែមេសា ឆ្នាំ២០២៣ លោក ង្វៀន វ៉ាន់ដូ , Nguyen Van Do ប្រធានការិយាល័យអចិន្ត្រៃយ៍ វិទ្យុសំឡេងវៀតណាម ប្រចាំកម្ពុជា ក្នុងនាមអង្គភាព សារព័ត៌មានវៀតណាមចំនួន៤ ប្រចាំកម្ពុជា បានគោរពជូន ឯកឧត្តម រដ្ឋមន្ត្រី ក្នុងឱកាសចូលឆ្នាំថ្មីប្រពៃណីដែលនឹងឈានចូលមកដល់នាពេលខាងមុខនេះ សូមមានសុខភាពល្អរឹងមាំ ដើម្បីធ្វើការដឹកនាំវិស័យព័ត៌មាន និងសោតទស្សន៍នៅកម្ពុជាកាន់តែមានភាពរីកចំរើន និងអភិវឌ្ឍន៍បន្ថែមទៀត ។
ថ្នាក់ដឹកនាំអង្គភាពសារព័ត័មានវៀតណាមដែលអញ្ជើញមកជូនពរ ឯកឧត្តម រដ្ឋមន្ត្រី ខៀវ កាញារីទ្ធ នាឱកាសនេះ រួមមាន លោក ថាច់ ថុង ប្រធានការិយាល័យអចិន្ត្រៃយ៍ទូរទស្សន៍ជាតិវៀតណាម ប្រចាំកម្ពុជា, លោក ហ្វីញ វ៉ាន់ថាវ ប្រធានការិយាល័យអចិន្ត្រៃយ៍ ទីភ្នាក់ងារសារព័ត៌មានវៀតណាម ប្រចាំកម្ពុជា និង លោក ង្វៀន ម៉ាច់ហៀប ប្រធានការិយាល័យអចិន្ត្រៃយ៍ កាសែតប្រជាជនវៀតណាម ប្រចាំកម្ពុជា ។
ឯកឧត្តម ខៀវ កាញារីទ្ធ បានសំដែងនូវការអរគុណចំពោះ អង្គភាពសារព័ត៌មានវៀតណាមទាំង៤ ដែលបានមកជូនពរឆ្នាំថ្មីប្រពៃណីជាតិខ្មែរ ហើយ ឯកឧត្តម ក៏បានវាយតំលៃខ្ពស់ចំពោះកិច្ចការល្អរបស់អង្គភាពសារព័ត៌មានវៀតណាមប្រចាំនៅកម្ពុជា ជាមួយ ក្រសួងព័ត៌មាន រួមជាមួយអង្គភាពចំណុះ ស្ថាប័នសារព័ត៌មាន រដ្ឋ និង ឯកជន ដែលធ្វើអោយ វិស័យសារព័ត៌មាន នៃប្រទេសទាំងពីរ កម្ពុជា វៀតណាម កាន់តែមានភាពរឹងមាំ ។
ឆ្លៀតក្នុងឱកាសនេះដែរ ឯកឧត្តម រដ្ឋមន្ត្រី បានសំដែរការអរគុណចំពោះថ្នាក់ដឹកនាំស្ថាប័នសារព័ត៌មាន រដ្ឋវៀតណាម ដែលជានិច្ចកាលតែងតែគាំទ្រ និងជួយឧបត្ថម្ភ ទាំងសំភារៈបច្ចេកទេសផ្សាយទាំងវិទ្យុ និងទូរទស្សន៍ ព្រមទាំងជួយបណ្តុះបណ្តាលធនធានមនុស្សថែមទៀតផងដែរ ៕