តុលាការសម្រេចឃុំខ្លួនមន្ត្រីនគរបាលម្នាក់ក្រោយរកឃើញជាប់ពាក់ព័ន្ធករណីឆបោក
ខេត្តកណ្តាល៖ ចៅក្រមស៊ើបសួរលោក អ៊ុក សុវណ្ណារិទ្ធ នៅរសៀលថ្ងៃទី១៧ ខែធ្នូ ឆ្នាំ២០២២នេះ បានចេញដីការសម្រេចឃុំខ្លួនជនសង្ស័យម្នាក់ជាបណ្ដោះអាសន្ន ទៅពន្ធនាគារខេត្តកណ្តាល ពីបទ «ឆបោក» តាមមាត្រា៣៧៧ និងមាត្រា៣៧៨ នៃក្រមព្រហ្មទណ្ឌ។
ជនសង្ស័យមានឈ្មោះ ធូក ចិន្តា ភេទស្រី អាយុ៣២ឆ្នាំ មានមុខរបរជាមន្ត្រីនគរបាល នៃស្នងការដ្ឋាននគរបាលខេត្តកណ្តាល ត្រូវបានប្រជាពលរដ្ឋជាង១០គ្រួសារ រស់នៅឃុំបឹងគ្រំ ស្រុកល្វាឯម ខេត្តកណ្តាល ដាក់ពាក្យបណ្តឹងប្តឹងទៅកាន់ក្រសួងមហាផ្ទៃ ជុំវិញករណីឆបោកប្រាក់ជិត២០ម៉ឺនដុល្លារ។
បន្ទាប់ពីទទួលបានពាក្យបណ្តឹងកម្លាំងនាយកដ្ឋាននគរបាលព្រហ្មទណ្ឌនៃក្រសួងមហាផ្ទៃ បានធ្វើការកោះហៅសួរនាំបំភ្លឺ ទើបធ្វើការឃាត់ខ្លួនបញ្ជូនទៅកាន់អយ្យការអមសាលាដំបូងខេត្តកណ្តាល បន្ទាប់ពីរកឃើញដូចការចោទប្រកាន់៕
