ឃាត់ខ្លួនជនជាតិចិន៧នាក់ ដែលចាប់បង្ខាំងមនុស្សដោយខុសច្បាប់ ជំរិតទារប្រាក់ នៅសង្កាត់ទី៤ក្រុងព្រះសីហនុ
ខេត្តព្រះសីហនុ៖ កម្លាំងសមត្ថកិច្ចខេត្តព្រះសីហនុ បានបើកប្រតិបត្តិការតាមប្រមាញ់ជាបន្តបន្ទាប់ រហូតឃាត់ខ្លួនជនជាតិចិន៧នាក់ និងដកហូតកាំភ្លើងខ្លីជាច្រើនដើម រួមទាំងវត្ថុតាងមួយចំនួនទៀត ពាក់ព័ន្ធនឹងករណីបង្ខាំងមនុស្សដោយខុសច្បាប់ នឹងជំរិតទារប្រាក់ ហើយកាន់កាប់រក្សាទុកប្រើប្រាស់អាវុធដោយខុសច្បាប់។
នាយឧត្តមសេនីយ៍ ខៀវ សុភ័គ រដ្ឋលេខាធិការ និងជាអ្នកនាំពាក្យក្រសួងមហាផ្ទៃ បានប្រាប់បណ្តាញព័ត៌មានឱ្យដឹងថា ប្រតិបត្តិការនេះ បានចាប់ផ្តើមចាប់ខ្លួនបានបន្ទាប់ពីសមត្ថកិច្ចចុះស្រាវជ្រាវ កាលរសៀលថ្ងៃទី០៩ ខែធ្នូ ឆ្នាំ២០២២ បានទទួលបណ្តឹងពីនារីជនជាតិចិនម្នាក់ ដែលបានប្តឹងរាយការណ៍តាមរយៈទូរស័ព្ទហតឡាញរបស់ ស្នងការដ្ឋាននគរបាលខេត្តព្រះសីហនុ ថាមិត្តភក្តិរបស់គេម្នាក់ ភេទប្រុស ជនជាតិចិន ត្រូវបានគេចាប់ជំរិតពីភ្នំពេញ មកខេត្តព្រះសីហនុ ដោយប្រើរថយន្ត០១គ្រឿង ម៉ាក Alphard ពណ៌ស ពាក់ស្លាកលេខ ភ្នំពេញ 2BQ-6785 បានដឹកសំដៅមកខេត្តព្រះសីហនុ។
លោកថា បន្ទាប់ពីទទួលបានបណ្តឹងរាយការណ៍នេះ នៅថ្ងៃទី១០ ខែធ្នូ ឆ្នាំ២០២២ នៅវេលាម៉ោង៣.៣០នាទី រសៀល កម្លាំងការិយាល័យនគរបាលព្រហ្មទណ្ឌកម្រិតស្រាល សហការជាមួយកម្លាំងអធិការដ្ឋាននគរបាលក្រុងព្រះសីហនុ និងកម្លាំងប៉ុស្តិ៍សង្កាត់លេខ៤ ចុះទៅធ្វើរដ្ឋបាលឆែកឆេរទីតាំងផ្ទះវីឡាមួយកន្លែង ដែលមានទីតាំងនៅក្នុងបុរីប៊ីអេស អូរទី៥ ស្ថិតនៅភូមិ៥ សង្កាត់៤ ក្រុងព្រះសីហនុ ដែលសង្ស័យថា ជាទីតាំងចាប់បង្ខាំងជនរងគ្រោះ ពេលទៅដល់ឃើញថា ទីតាំងផ្ទះវីឡានោះ បានបើកទ្វារចំហរ បន្ទាប់ពីធ្វើការឆែកឆេរត្រួតឃើញថា ជនសង្ស័យបានគេចខ្លួនបាត់អស់ មុនពេលកម្លាំងសមត្ថកិច្ចទៅដល់ ហើយនៅក្នុងផ្ទះនោះមានសភាពរញ៉េរញ៉ៃ មិនមានមនុស្សនៅទេ។ បើទោះជាយ៉ាងនេះក៍ដោយ កម្លាំងសមត្ថកិច្ចក៏បានបន្តការស្រាវជ្រាវ រហូតដល់វេលាម៉ោង១៧.០០នាទី ទើបដឹងថា ជនសង្ស័យបានជិះរថយន្ត ០១គ្រឿង ម៉ាក Alphard ពណ៌ស ពាក់ស្លាកលេខ ភ្នំពេញ 2BS-9866 គេចចេញទីតាំងកើតហេតុ ទៅសង្ងំលាក់ខ្លួននៅសណ្ឋាគារ ហឺលី ដែលមានទីតាំងស្ថិតនៅភូមិ៣ សង្កាត់៤ ក្រុងព្រះសីហនុ។
នាយឧត្តមសេនីយ៍រូបនេះបានបន្តថា ដោយមានការចូលរួមសហការពីម្ចាស់សណ្ឋាគារ ហឺលី កម្លាំងសមត្ថកិច្ចធ្វើការស្រាវជ្រាវឃាត់ខ្លួនបានជនសង្ស័យ ០១នាក់ ភេទប្រុស ជនជាតិចិន នៅក្នុងបន្ទប់សណ្ឋាគារខាងលើ និងរកឃើញវត្ថុតាងអាវុធខ្លី០២ដើម ,ខ្នោះដៃ ,ដំបងឆក់ ,ស្ព្រាយឧស្ម័នបង្ហូរទឹកភ្នែក ,ស្កុតរុំ និងសម្ភារផ្សេងៗមួយចំនួនទៀត។
ដោយបានចម្លើយសារភាពពីជនសង្ស័យខាងលើនេះ កម្លាំងសមត្ថកិច្ចបានបន្តការស្រាវជ្រាវរហូតដល់វេលាម៉ោង ១៨.៤០នាទី ទើបឈានដល់ការឃាត់ខ្លួនជនសង្ស័យបានចំនួន០៥នាក់ ភេទប្រុស ជនជាតិចិន បន្ថែមទៀត នៅចំណុចសណ្ឋាគារ លិថាងលិងឆឹង មានទីតាំងស្ថិតនៅ ភូមិ៤ សង្កាត់៤ ក្រុង-ខេត្តព្រះសីហនុ។
យោងតាមអ្នកនាំពាក្យបានបញ្ជាក់ថា បន្ទាប់ពីទទួលបានតំរុយថា បក្ខពួកជនសង្ស័យបានបើករថយន្ត ០១គ្រឿង ម៉ាក Alphard ពណ៌ស ពាក់ស្លាកលេខ ភ្នំពេញ 2BQ-6785 (មធ្យោបាយធ្វើសកម្មភាពចាប់ជនរងគ្រោះ) ទៅចតទុកចោលនៅចំណុច ក្រុមទី៩ ភូមិ១ សង្កាត់៣ ក្រុងព្រះសីហនុ កម្លាំងជំនាញ បានចុះទៅធ្វើការស្រាវជ្រាវ រហូតដល់ថ្ងៃទី១១ ខែធ្នូ ឆ្នាំ២០២២ វេលាម៉ោង ១៦ ទើបចាប់ខ្លួនបានជនសង្ស័យ ០១នាក់ ភេទប្រុស ជនជាតិចិន បន្ថែមទៀត ដោយជនសង្ស័យសង្ងំលាក់ខ្លួនក្នុងបន្ទប់ជួលមួយកន្លែង នៅចំណុចក្រុមទី៩ ភូមិ១ សង្កាត់៣ ក្រុងព្រះសីហនុ ហើយជនសង្ស័យនេះគឺជាអ្នកដែលបានបើករថយន្ត ០១គ្រឿង ម៉ាក Alphard ពណ៌ស ពាក់ស្លាកលេខ ភ្នំពេញ 2BQ-6785 មធ្យោបាយធ្វើសកម្មភាពចាប់ជនរងគ្រោះ មកចតទុកចោលនៅម្តុំទីតាំងខាងលើ។
ក្នុងកិច្ចប្រតិបត្តិការនេះ កម្លាំងសមត្ថកិច្ចបានធ្វើការឃាត់ខ្លួនបានជនសង្ស័យ ០៧នាក់ យកមកធ្វើការសាកសួរនៅការិយាល័យនគរបាលព្រហ្មទណ្ឌកម្រិតស្រាល ក្នុងនោះមានឈ្មោះដូចខាងក្រោម៖
១៖ ឈ្មោះ LI GANG ភេទប្រុស អាយុ ២០ឆ្នាំ ជនជាតិចិន មុខរបរ មិនពិតប្រាកដ មានទីលំនៅ ភូមិ៤ សង្កាត់៤ ក្រុង-ខេត្តព្រះសីហនុ។
២៖ ឈ្មោះ LIN EN ភេទប្រុស អាយុ ២០ឆ្នាំ ជនជាតិចិន មុខរបរ មិនពិតប្រាកដ មានទីលំនៅ ភូមិ៤ សង្កាត់៤ ក្រុង-ខេត្តព្រះសីហនុ។
៣៖ ឈ្មោះ LI YONG BIN ហៅ LI CHUN ភេទប្រុស អាយុ ២៥ឆ្នាំ ជនជាតិចិន មុខរបរ មិនពិតប្រាកដ មានទីលំនៅ ភូមិ៤ សង្កាត់៤ ក្រុង-ខេត្តព្រះសីហនុ។
៤៖ ឈ្មោះ DENG SHENG WEN ភេទប្រុស អាយុ ២៦ឆ្នាំ ជនជាតិចិន មុខរបរ មិនពិតប្រាកដ មានទីលំនៅ ភូមិ៤ សង្កាត់៤ ក្រុង-ខេត្តព្រះសីហនុ។
៥៖ ឈ្មោះ ZHAO YUN FEI ភេទប្រុស អាយុ ២៧ឆ្នាំ ជនជាតិចិន មុខរបរ មិនពិតប្រាកដ មានទីលំនៅ ភូមិ១ សង្កាត់៣ ក្រុង-ខេត្តព្រះសីហនុ។
៦៖ ឈ្មោះ YANG HUI ភេទប្រុស អាយុ ២១ឆ្នាំ ជនជាតិចិន មុខរបរ មិនពិតប្រាកដ មានទីលំនៅ ភូមិ៤ សង្កាត់៤ ក្រុង-ខេត្តព្រះសីហនុ។
៧៖ ឈ្មោះ ZHANG SHU ភេទប្រុស អាយុ ២៧ឆ្នាំ ជនជាតិចិន មុខរបរ មិនពិតប្រាកដ មានទីលំនៅ ភូមិ៤ សង្កាត់៤ ក្រុង-ខេត្តព្រះសីហនុ។
