ឆ្នាំ២០២២នេះនៅខេត្តរតនគិរីមានបេក្ខជនប្រឡងសញ្ញាបត្រមធ្យមសិក្សាទុតិយភូមិចំនួន១,៦០៦នាក់ ស្រី៧៩០នាក់ ក្នុងនោះមានបេក្ខជាជនជាជនជាតិដើមភាគតិចចំនួន ៥១០នាក់ ស្រី២៤៧នាក់
ខេត្តរតនគិរី៖ នៅថ្ងៃចន្ទ ទី៥ ខែធ្នូ ឆ្នាំ២០២២នេះ ការប្រឡងសញ្ញាបត្រមធ្យមសិក្សាទុតិយភូមិ បាក់ឌុប ឆ្នាំសិក្សា២០២២ បានចាប់ផ្តើមដំណើរការហើយនៅទូទាំងប្រទេសកម្ពុជា ចំណែកខេត្តរតនគិរី ក៏បានដំណើរការប្រឡងនៅថ្ងៃនេះផងដែរ។
លោក ខាត់ សាម៉ាល់ ប្រធានមន្ទីរអប់រំ យុវជន និងកីឡាខេត្តរតនគិរី បានបញ្ជាក់ថា ដំណើរការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា សម្រាប់ខេត្តរតនគិរី សម័យប្រឡង ថ្ងៃទី៥-៦ឆ្នាំ២០២២ នេះ មានចំនួន៣មណ្ឌលប្រឡងគឺ៖
1-មណ្ឌលប្រឡងអនុវិទ្យាល័យ ប៊ូ ថង ទេសអន្លុង ថ្នាក់វិទ្យាសាស្ដ្រ មានចំនួន ១៤បន្ទប់មានបេក្ខជនសរុប៣៤១នាក់ ស្រី១៧៧នាក់។
2-មណ្ឌលវិទ្យាល័យសម្ដេចឪ-សម្ដេចម៉ែ ថ្នាក់វិទ្យាសាស្ដ្រសង្គម ចំនួន៣០បន្ទប់ មានបេក្ខជនសរុប ៧៣៣នាក់ ស្រី៣៨៨នាក់។
3-មណ្ឌលប្រឡងវិទ្យាល័យហ៊ុន សែន ភូមិថ្មី ថ្នាក់វិទ្យាសាស្ត្រសង្គមមាន២២បន្ទប់មានបេក្ខជន៥៣៣នាក់ ស្រី២២៥នាក់។ សរុបរួមទាំង៣មណ្ឌល មានបេក្ខជនសរុប ១,៦០៧នាក់ ស្រី៧៩០នាក់ ក្នុងនោះមានបេក្ខជន ជាជនជាតិដើមភាគតិចចំនួន ៥១០នាក់ ស្រី២៤៧នាក់។
ក្នុងឱ្យកាសនោះដែរឯកឧត្តម ញ៉ែម សំអឿន អភិបាលនៃគណៈអភិបាលខេត្តរតនគិរី ដែលបានអញ្ជើញចូលរួមបើកកញ្ចប់វិញ្ញាសាប្រឡង នាព្រឹកថ្ងៃចន្ទទី៥នេះ នៅមណ្ឌលប្រឡងវិទ្យាល័យសម្តេចឪ-សម្តេចម៉ែ បានលើកទឹកចិត្តដល់ក្មួយៗដែលជាបេក្ខជន បេក្ខនារីទាំងអស់ ត្រូវខិតខំធ្វើឱ្យអស់ពីលទ្ធភាព និងចូលរួមថែទាំសុខភាពឱ្យបានល្អ សម្រាកឱ្យបានគ្រប់គ្រាន់ និងជូនពរប្រឡងជាប់គ្រប់ៗគ្នា។
ឯកឧត្តមក៏បានរៀបរាប់នៅក្នុងថ្ងៃប្រឡងនេះថា ការប្រឡងឆ្នាំនេះដំណើរការទៅរយៈពេល២ថ្ងៃគឺទី៥ និងទី៦ ខែធ្នូ ឆ្នាំ២០២២ ហើយក្រសួងអប់រំ យុវជន និងកីឡា បានធ្វើការរឹតបន្ទឹងដល់បេក្ខជន បេក្ខនារី ដើម្បីធ្វើយ៉ាងណាឱ្យវិស័យអប់រំនៅកម្ពុជា មានគុណភាព។
សូមជម្រាប់ថា ការប្រឡងឆ្នាំនេះបេក្ខជន បេក្ខនារីទាំងអស់ ត្រូវពាក់ម៉ាសនិងបង្ហាញកាតចាក់វ៉ាក់សាំងការពារជំងឺកូវីដ-១៩ទើបអនុញ្ញាតអោយចូលប្រឡង។ជាពិសេសមានគ្រូអនុរក្ស ចាំឆែកឆេរលើដងខ្លួនបេក្ខជនប្រឡងមុននឹងឱ្យចូលក្នុងបន្ទប់ប្រឡងសំដៅធានាថាបេក្ខជនបេក្ខនារីទាំងអស់មិនមានឱកាសបានយកសំណៅឯកសារ ព្រីយ៉ុង ឬម៉ាស៊ីនគិតលេខ ទូរស័ព្ទ ចូលក្នុងបន្ទប់ប្រឡងបានដាច់ខាត៕
