សមត្ថកិច្ចប្រឆាំងគ្រឿងញៀនបង្ក្រាបទីតាំងកែច្នៃគ្រឿងញៀន ៣ ទីតាំងផ្សេងគ្នា រកឃើញគ្រឿងញៀនជាង ២០០ គីឡូក្រាម និងគ្រឿងផ្សំជាង ១១ តោន
ភ្នំពេញ ៖ សមត្ថកិច្ចបន្ទាប់ពីធ្វើការស្រាវជ្រាវអស់រយៈពេលជាង ២ ខែរួចមក កាលពីពេលថ្មីៗនេះ សមត្ថកិច្ចបានបើកប្រតិបត្តិការបង្ក្រាបមន្ទីរពិសោធន៍លួចលាក់កែច្នៃផលិតសារធាតុញៀន នៅចំនួន ៣ ទីតាំងផ្សេងគ្នានៅភ្នំពេញ និងខេត្តកំពង់ស្ពឺ រឹបអូសគ្រឿងញៀនបានជាង ២០០ គីឡូក្រាមនិងគ្រឿងផ្សំជាង១១តោន។
របាយការណ៍របស់អគ្គស្នងការនគរបាលជាតិដែលចេញផ្សាយនៅថ្ងៃនេះបានបញ្ជាក់ថា ប្រតិបត្តិការបង្ក្រាបនេះអនុវត្តតាមបទបញ្ជារបស់ ឯកឧត្តម អគ្គស្នងការ និងឯកឧត្តម អគ្គស្នងការរង ទទួលផែនប្រឆាំងបទល្មើសគ្រឿងញៀន ក្រោមការបញ្ជាផ្ទាល់ពី ឯកឧត្តម ឧត្ដមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀនកម្លាំងជំនាញ ”ក១០” របស់មន្ទីរប្រឆាំងគ្រឿងញៀន សហការជាមួយកម្លាំងជំនាញនៃស្នងការនគរបាលរាជធានីភ្នំពេញ និងខេត្តកំពង់ស្ពឺ ក្រោមការសម្របសម្រួលពីព្រះរាជអាជ្ញារងអមសាលាដំបូងរាជធានីភ្នំពេញនិងព្រះរាជអាជ្ញារងអមសាលាដំបូងខេត្តកំពង់ស្ពឺឈានដល់ការបង្ក្រាបមន្ទីរពិសោធន៍លួចលាក់កែច្នៃផលិតសារធាតុញៀននៅ៣ទីតាំងផ្សេងគ្នាជាបន្តបន្ទាប់។
ទីតាំងទី១នៅបន្ទប់លេខ៨០២ក្នុងខុនដូJCITY ផ្លូវលេខ៣២២ សង្កាត់បឹងកេងកង ១ ខណ្ឌបឹងកេងកង រាជធានីភ្នំពេញ ។ ទីតាំងទី ២ នៅក្នុងចម្ការស្វាយភូមិតាំងស្រឹងឃុំសង្កែសាទប ស្រុកឱរ៉ាល់ ខេត្តកំពង់ស្ពឺ និងទីតាំងទី ៣ នៅក្នុងចម្ការស្វាយភូមិស្រល់ ឃុំយាយម៉ៅ ពេជ្រនិល ស្រុកភ្នំស្រួច ខេត្តកំពង់ស្ពឺ ។
ប្រតិបត្តិការនេះ មន្ត្រីជំនាញឃាត់ខ្លួនជនសង្ស័យចំនួន ៤ នាក់ជនជាតិចិន(តៃវ៉ាន់) រួមមានទី១ឈ្មោះ ទៀង ចាន់ហ្វូ ភេទប្រុស អាយុ២៨ឆ្នាំ (មេការ) ទី២ ឈ្មោះ ឃួភូវែន ភេទប្រុសអាយុ២៨ឆ្នាំ ទី៣ ឈ្មោះ តាំង គូជីង ភេទប្រុសអាយុ៣៩ឆ្នាំ និងទី ៤ ឈ្មោះ លីន យីឆេង ភេទប្រុសអាយុ៣១ឆ្នាំ អ្នកទាំងបីនាក់ជាអ្នកបច្ចេកទេស។
ចំណែកវត្ថុតាងដែលចាប់យករួមមានម៉ាស៊ីនឧបករណ៍សម្ភារសម្រាប់កែច្នៃផលិតវេចខ្ចប់មួយចំនួនធំ។សារធាតុញៀនប្រភេទកេតាមីនទម្ងន់៤១kg៥១.៧g-ល្បាយសារធាតុញៀនកេតាមីនទម្ងន់១៤២៥kg-ថ្នាំគ្រាប់នីមេតាហ្សេប៉ាមទម្ងន់0.៩g-សារធាតុគីមីផ្សំ១១តោននឹង៥២៥kg។
បច្ចុប្បន្នជនសង្ស័យព្រមទាំងវត្ថុតាងខាងលើមន្ទីរប្រឆាំងគ្រឿងញៀនបានកសាងសំណុំរឿងបញ្ជូនទៅសាលាដំបូងរាជធានីភ្នំពេញដើម្បីចាត់ការបន្តតាមនីតិវិធី៕
