អភិបាលខេត្តមណ្ឌលគិរី បកស្រាយប្រសាសន៍ថា អ្នកកាសែតហ្វេសប៊ុក គឺអ្នកកាសែតចង្រៃ មិនសំដៅអ្នកសារព៌ត៌មានទូទៅទេ
ភ្នំពេញ៖ ឯកឧត្តម ថង សាវុន អភិបាលខេត្តមណ្ឌលគិរី នៅថ្ងៃទី២៨ ខែមេសា ឆ្នាំ២០២២នេះ បានមានប្រសាសន៍បកស្រាយអំពីប្រសាសន៍របស់លោក ដែលបានលើកឡើងនាពេលថ្មីនេះ ពាក់ព័ន្ធអ្នកសារព័ត៌មានមួយចំនួន ដោយលោកចាត់ទុកថា ជាអ្នកកាសែតចង្រៃ។
ឯកឧត្តមអភិបាលខេត្តមណ្ឌលគិរី បានបកស្រាយពីប្រសាសន៍របស់លោក ដែលលើកឡើងនៅក្នុងដំណើរទៅសួរសុខទុក្ខមន្ត្រីការពារដែនជម្រកសត្វព្រៃស្រែពក ស្ថិតនៅក្នុងស្រុកកោះញែក ខេត្តមណ្ឌលគិរី ដោយប្រាប់មន្ត្រីទាំងនោះថា អ្នកសារព័ត៌មានមួយចំនួន ជាពិសេសអ្នកសារព័ត៌មាន ផ្សាយដំណឹងតាមប្រព័ន្ធទំនាក់ទំនងសង្គម ហ្វេសប៊ុក ហើយមិនមានគេហទំព័រ ឬបោះពុម្ភផ្សាយ។
ការលើកឡើងបែននេះ លោកអភិបាលខេត្តបានមានប្រសាសន៍នៅក្នុងកិច្ចសម្ភាសន៍ជាមួយលោកបណ្ឌិត ម៉េង សុភ័ណ្ឌ ប្រធានសមាគមន៍សារព័ត៌មានអេឡិចត្រូនិច អឹមអេសជេ នាព្រឹកថ្ងៃនេះថា «គឺជាការលើកឡើង សំដៅលើក្រុមបុគ្គលមួយចំនួន មិនបានសំដៅលើក្រុមអ្នកសារព័ត៌មានទាំងអស់ទូទាំងប្រទេស ឬទូទាំងពិភពលោកអីទេ គឺសំដៅក្រុមសារព័ត៌មានក្រុមមួយចំនួន។ ដូច្នេះ សូមកុំមានការយល់ច្រឡំ។ សូមកុំឲ្យបងប្អូនអ្នកសារព័ត៌មានដទៃយល់ច្រឡំថា ជាការវាយប្រហារ ឬខ្ញុំលើកឡើងជាភាសាណាអសុរោះទៅលើបងប្អូន ជាអ្នកសារព័ត៌មានទាំងអស់»។
នៅពេលសួរថា តើសម្តីនេះ សំដៅលើអ្នកសារព័ត៌មាន ដែលមិនបានជម្រាបដំណឹងអំពីវត្តមានពួកគាត់ ពេលធ្វើដំណើរចូលដល់ទឹកដីខេត្តមណ្ឌលគិរី ហើយបង្កបញ្ហា ឬសង្កេតត្រូបានលោកឃើញការអនុវត្តវិជ្ជាជីវៈ ប្រាសចាកពីក្រមសីលធម៌ ឯកឧត្តម ថង សាវុន បានមានប្រសាសន៍បកស្រាយថា «ដូចបងប្អូនអ្នកសារព័ត៌មាន ដែលមានវិជ្ជាជីវៈត្រឹមត្រូវ ក៏ដូចជាក្រុមអ្នកសារព័ត៌មាន ដែលមានអង្គការចាត់តាំងត្រឹមត្រូវ មានស្ថាប័នត្រឹមត្រូវនោះ គឺគ្មានអ្វីគួរឲ្យកត់សម្គាល់ទេ។ [ប៉ុន្តែ] សម្រាប់ក្រុមសារព័ត៌មានមួយចំនួនតូច ដែលចុះទៅយកព័ត៌មាន ដោយមិនសហការជាមួយអាជ្ញាធរ ហើយផ្សាយព័ត៌មានមិនពិត មិនទទួលខុសត្រូវ»។
ផ្ទុយទៅវិញ ឯកឧត្តមបានសំណូមពរដល់ម្ចាស់ស្ថាប័ន សូមជួយពិនិត្យមើលសកម្មភាពអនុវត្តវិជ្ជាជីវៈ ក្នុងសំណោមបុគ្គលិក ឬសមាជិកក្រុមការងាររបស់ខ្លួន ដើម្បីធ្វើយ៉ាងណាអាចធានាបាននូចគុណភាពព័ត៌មាន ដែលពួកគាត់ផ្សាយចេញទៅ។
លោកបានបកស្រាយទៀតថា ការផ្សាយព័ត៌មានមិនពិតខ្លះ បានក្លាយជាព័ត៌មានបែបញុះញង់ មិនឆ្លុះបញ្ចាំងពីទិដ្ឋភាពជាក់ស្តែងនៅក្នុងសង្គមជាតិ។ ដូច្នេះចំពោះប្រសាសន៍របស់លោក ដែលថាអ្នកកាសែតហ្វេសប៊ុក ជាអ្នកកាសែតចង្រៃ គឺសំដៅលើអ្នកសារព័ត៌មានប្រកបការងារមិនសូវប្រកាន់ខ្ជាប់តាមក្រមសីលធ៌មវិជ្ជាជីវៈ។
លោកបណ្ឌិត ម៉េង សុភ័ណ្ឌ បានសួរថា តើក្នុងគោលដៅនៃគំនិតនិយាយចេញទៅនោះ តើក្នុងគោលដៅមួយណា? ឯកឧត្តមឆ្លើយថា «សម្តីនេះគឺសំដៅលើបុគ្គលមួយចំនួន ដែលប្រកបវិជ្ជាជីវៈមិនបានត្រឹមត្រូវ។
នៅពេលសួរអំពីគោលដៅនៃប្រសាសន៍របស់ឯកឧត្តអភិបាលខេត្ត អំពីកំហុសក្រមសីលធម៌អ្នកសារព៌ត៌មាន លោកបានប្រសាសន៍បកស្រាយថា អ្នកសារព័ត៌មាន សូមចូលរួមក្នុងការងារឆ្លុះបញ្ចាំងពីទិដ្ឋភាពជាក់ស្តែង ដើម្បីបម្រើផលប្រយោជន៍សង្គមជាតិ ដែលប្រជាពលរដ្ឋចង់ដឹង និងអាចធ្វើការសម្រេចចិត្តត្រឹមត្រូវ៕
