អាជ្ញាធរខេត្តរតនគិរី បើកកិច្ចប្រជុំពិភាក្សា និងវាយតម្លៃអចលនទ្រព្យសម្រាប់ជាមូលដ្ឋានគិតពន្ធប្រថាប់ត្រា នៅខេត្តរតនគិរី
នៅព្រឹកថ្ងៃទី២៤ ខែវិច្ឆិកា ឆ្នាំ២០២១ រដ្ឋបាលខេត្តរតនគិរីបានរៀបចំកិច្ចប្រជុំ ពិភាក្សា និងវាយតម្លៃអចលនទ្រព្យសម្រាប់ជាមូលដ្ឋានគិតពន្ធប្រថាប់ត្រា នៅខេត្តរតនគិរី។ កិច្ចប្រជុំនេះធ្វើឡើងនៅសាលប្រជុំសាលាខេត្ត អាគារC ក្រោមអធិបតីភាពឯកឧត្តម ញ៉ែម សំអឿន អភិបាលនៃគណៈអភិបាលខេត្តរតនគិរី និងមានការអញ្ជើញចូលរួមពីឯកឧត្តមអភិបាលរងខេត្ត អភិបាលក្រុងស្រុក ប្រធានមន្ទីរនិងមន្ដ្រីជំនាញពាក់ព័ន្ធជាច្រើនរូបផងដែរ។
ជាមួយគ្នានេះ ឯកឧត្តម ញ៉ែម សំអឿន អភិបាលខេត្តរតនគិរី មានប្រសាសន៍ថាកិច្ចប្រជុំនាឱកាសនេះ ដើម្បីពិនិត្យ ពិភាក្សា វាយតម្លៃ និងផ្ដល់ជាមតិយោបល់កែតម្រូវទាំងអស់គ្នា សម្រាប់ជាមូលដ្ឋានគិតពន្ធប្រថាប់ត្រា ក្នុងខេត្តរតនគិរី អោយកាន់តែមានភាពត្រឹមត្រូវ និងតម្លៃសមស្របសម្រាប់ម្ចាស់អចលនទ្រព្យ ។
ក្នុងកិច្ចប្រជុំនេះមន្ដ្រីជំនាញពន្ធដារបានធ្វើបទបង្ហាញ ស្ដីពី ការបែងចែកភូមិសាស្ដ្រ និងតម្លៃថ្មី ក៏ដូចជាបន្ថែមទីតាំងមួយចំនួនដែលមិនទាន់មានដាក់តម្លៃ នៃការគិតពន្ធប្រថាប់ត្រា លើអចលនទ្រព្យ តាមភូមិសាស្ដ្រមួយចំនួន ទាំងក្នុងក្រុងបានលុង និងតាមស្រុកនីមួយៗ ជូនអង្គប្រជុំពិនិត្យ ពិភាក្សា និងកែតម្រូវជាថ្មី ឡើងវិញ ។
ក្នុងនោះ ឯកឧត្ត ញ៉ែម សំអឿន អភិបាលខេត្តរតនគិរី ក៏បានផ្ដល់អនុសាសន៍អោយមន្ដ្រីជំនាញ និងអភិបាលក្រុងស្រុកពាក់ព័ន្ធត្រូវពិភាក្សា និងវាយតម្លៃអោយបានម៉ត់ចត់ទៅលើតម្លៃនីមួយៗ ដើម្បីធ្វើយ៉ាងណាអោយមានភាពសមស្របសម្រាប់ម្ចាស់អចលនទ្រព្យ ក៏ដូចជាសមស្របសម្រាប់រដ្ឋ ដើម្បីធ្វើអោយការប្រមូលពន្ធមានប្រសិទ្ធិភាព៕
