ឃាត់ខ្លួនជនសង្ស័យ២នាក់ ខណៈពេលធ្វើសកម្មភាពលួចម៉ូតូ១គ្រឿង នៅខណ្ឌដង្កោរាជធានីភ្នំពេញ
ហេតុការណ៍នេះដែលធ្វើឱ្យមានការភ្ញាក់ផ្អើល កាលពីថ្ងៃទី២៥ ខែសីហា ឆ្នាំ២០២៣ នៅចំណុចវាលស្រែខាងជើងភូមិទ័ពបោះ ស្ថិតក្នុងសង្កាត់ព្រៃវែង ខណ្ឌដង្កោ រាជធានីភ្នំពេញ។ បើតាមសេចក្តីរាយការណ៍បានឱ្យដឹងថា ជនសង្ស័យចំនួន២នាក់ ត្រូវបានកម្លាំងនគរបាលខណ្ឌដង្កោ ធ្វើការឃាត់ខ្លួន ខណៈពេលធ្វើសកម្មភាពលួ.ចម៉ូតូ១គ្រឿង ហើយក្នុងចំណោមជនសង្ស័យទាំង២នាក់នេះ ក៏មានម្នាក់បានកាន់កាតជាអ្នកសារព័ត៌មាន សម្លេងប្រជាជន និងមានតួនាទីជានិពន្ធនាយករងថែមទៀតផង។
ជនសង្ស័យនេះ ទី១- ឈ្មោះ រុន សុវណ្ណឌី អាយុ៣៥ឆ្នាំ កាន់កាតកាសែត «សម្លេងប្រជាជន » តួនាទីនិពន្ធនាយករង ស្នាក់នៅផ្ទះជួល ស្ថិតក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ នឹងមានស្រុកកំណើតភូមិបុសផ្លាំង ឃុំបុសមន ស្រុករំដួល ខេត្តស្វាយរៀង។ ទី២- ឈ្មោះ ហួរ វី អាយុ៣៨ឆ្នាំ ស្នាក់នៅផ្ទះជួល ស្ថិតក្នុងភូមិដីថ្មី សង្កាត់ស្ទឹងមានជ័យទី៣ ខណ្ឌមានជ័យ។ ជនសង្ស័យទាំង២នាក់នេះ បានលួ.ចម៉ូតូ១គ្រឿងម៉ាកហុងដាឌ្រីម ពណ៌ខ្មៅ ស៊េរី២០១៨ ពាក់ស្លាកលេខ ភ្នំពេញ1GW-7146 ជាកម្មសិទ្ធិរបស់ឈ្មោះ ម៉េស នី ភេទប្រុស អាយុ៤៧ឆ្នាំ មុខរបរកសិករ រស់នៅភូមិទ័ពបោះ សង្កាត់ព្រៃវែង ខណ្ឌដង្កោ ។
នៅមុនកើតហេតុ បុរសរងគ្រោះបានជិះម៉ូតូទៅផ្លាស់គោ នៅឯវាលស្រែខាងជើងភូមិ ដោយចតម៉ូតូនៅលើផ្លូវ និងបានចាក់សោ.កត្រឹមត្រូវ ខណៈពេលនោះ ស្រាប់តែលេចមុខជនសង្ស័យទាំង២នាក់ ជិះម៉ូតូម៉ាកហុងដាស្កូបពី ពណ៌ខ្មៅ ស៊េរីឆ្នាំ២០២៣ ពាក់ស្លាកលេខ ភ្នំពេញ1JF-0654 ទៅឈប់ក្បែរម៉ូតូរបស់ជនរងគ្រោះ រួចស្រែកសួរសុខទុក្ខគាត់ (ជនរងគ្រោះ) ថា «សុខសប្បាយអត់» ថែមទៀតផង។
ភ្លាមៗនោះ ជនរងគ្រោះបានស្រែកឆោឡោបង្កឱ្យមានការភ្ញាក់ផ្អើលដល់អ្នកភូមិ និងកម្លាំងប្រជាការពារ ព្រមទាំងនគរបាល បានដេញតាមជនសង្ស័យ បន្ទាប់មកជនសង្ស័យក៏ផ្តួលម៉ូតូហុងដាឌ្រីមចោល រួចលោ.តឡើងជិះម៉ូតូជាមួយបក្សពួក ដើម្បីរត់គេច រហូតដល់ប្រឡាយ ស្ថិតក្នុងភូមិពងទឹក សង្កាត់ពងទឹក ក៏ធ្លាក់ប្រឡាយតែម្ដង ហើយត្រូវសមត្ថកិច្ចព័ទ្ធចាប់បានទាំង២នាក់។
ជនសង្ស័យទាំង២នាក់ រួមជាមួយនឹងវត្ថុតាងទៅសាកសួរ ទើបបានដឹងថា ជនសង្ស័យម្នាក់ឈ្មោះ រុន សុវណ្ណឌី គឺជាអ្នកនិពន្ធនាយករងកាសែត ហើយក៏ជាមុខសញ្ញាចាស់ខាងអំពើចោរកម្មទៀតផង។ នគរបាលកំពុងតែកសាងសំណុំរឿង ដើម្បីបញ្ជូនខ្លួនជនសង្ស័យទាំង២នាក់នេះ ទៅកាន់តុលាការហើយ ដើម្បីចាត់ការតាមច្បាប់៕
