ឯកឧត្តម គួច ចំរើន អភិបាលខេត្តព្រះសីហនុថា គ្មានការលើកលែងជាដាច់ខាតចំពោះអ្នកចរាចរណ៍ជួញដួញដូរប្រើប្រាស់ និងអ្នកផ្តល់អាវុធខុសច្បាប់ លោកនឹងចាត់កម្លាំងស្រាវជ្រាវចាត់វិធានការច្បាប់មិនលើកលែងឡើយ
ខេត្តព្រះសីហនុ៖ ឯកឧត្ដម គួច ចំរើន អភិបាលខេត្តព្រះសីហនុ និងប្រធាន គណៈបញ្ជាការឯកភាព នៅព្រឹកថ្ងៃទី16 ខែមិថុនា ឆ្នាំ2022 បានអញ្ជើញចុះសួរសុខទុក្ខ មន្ត្រីនគរបាលមួយរូបដែលរងរបួសជើង ក្នុងពេលចុះបំពេញបេសកកម្ម”បង្ក្រាបជនប្រដាប់អាវុធ”នៅយប់ថ្ងៃទីដប់ប្រាំ ខែមិថុនា ឆ្នាំ2022 នៅក្នុងភូមិសាស្ត្រសង្កាត់ លេខបួន ក្រុងព្រះសីហនុ ខេត្តព្រះសីហនុ។
គួរបញ្ជាក់ថា កាលពីយប់ថ្ងៃទី15 ខែមិថុនា ឆ្នាំ2022 ក្រោយទទួលបានដំណឹង ពីអ្នកបើករថយន្ត តាក់ស៊ីរាយការណ៍ថា មានករណីជនជាតិវៀតណាម មួយក្រុមជិះរថយន្តរបស់គាត់ ហើយបានដកកាំភ្លើងភ្ជង់ គំរាម ភ្លាមៗ សមត្ថកិច្ចបានដាក់រាយកម្លាំងស្ទាក់ ដើម្បីត្រួតពិនិត្យ នៅចំណុចផ្លូវអាដឺឡុង ផ្លូវចុះទៅឆាយណាថោន ស្ថិតក្នុងភូមិប្រាំមួយ សង្កាត់លេខបួន ក្រុងព្រះសីហនុ ខេត្តព្រះសីហនុ។
ខណៈពេលនោះ មុខសញ្ញាក៏បានមកដល់ សមត្ថកិច្ចទាំងនោះ ក៏បានចូលទៅត្រួតពិនិត្យ ប៉ុន្តែជនសង្ស័យទាំងនោះ បានព្យាយាមមិនសហការជាមួយសមត្ថកិច្ចនោះទេ ហើយបុរសម្នាក់ជាជនជាតិចិន ក្នុងចំណោមគ្នាប្រាំនាក់នោះ ក៏បានទាញកាំភ្លើងបាញ់ មកលើសមត្ថកិច្ចមួយគ្រាប់ បណ្ដាលឲ្យលោកអធិការរងម្នាក់ រងរបួសជើងខាងស្ដាំ ត្រូវបានបញ្ជូនទៅ មន្ទីរពេទ្យឯកជន សេតេ។
ជុំវិញករណីខាងលើនេះ សមត្ថកិច្ចឃាត់ខ្លួនជនសង្ស័យទាំង 5នាក់នោះ រួមទាំងស្រីពីរនាក់ និងដកហូតកាំភ្លើង បានចំនួន01ដើម ទៀតផង។
បន្ទាប់ពីឯកឧត្តមអភិបាលខេត្តបានអញ្ជើញចុះសួរសុខទុក្ខមន្ត្រីនគរបាលខាងលើនេះ ឯកឧត្តមមានប្រសាសន៍ថា គ្មានការលើកលែងជាដាច់ខាត ចំពោះអ្នកដែលចរាចរណ៍ ជួញដូរ និងអ្នកផ្តល់អាវុធខុសច្បាប់ ហើយត្រូវស្រាវជ្រាវអោយដល់ឫសគល់ ហើយនិងត្រូវចាត់វិធានការទៅតាមច្បាប់ មិនលើកលែងឡើយ៕
