បុគ្គលិកអង្គការWWFម្នាក់ ត្រូវរថយន្តបុកស្លាប់ នៅក្រុងសែនមនោរម្យមណ្ឌលគិរី
ខេត្តមណ្ឌលគិរី : បុគ្គលិកអង្គការអភិរក្សសត្វព្រៃ WWF ម្នាក់ត្រូវរថយន្តបុកស្លាប់គ្រាដែលកំពុងបើកបរម៉ូតូ ។ សមត្ថកិច្ចមូលដ្ឋានថា ហេតុការណ៍នេះបានកើតឡើងកាលពីព្រឹកថ្ងៃ ទី១៤ ខែមិថុនា ឆ្នាំ២០២២២ នៅលើកំណាត់ផ្លូវជាតិលេខ ៧៦A ទល់មុខរមណីយដ្ឋានចំការការហ្វេ ចន្លោះគីឡូម៉ែត្រលេខ ១២៨ និង លេខ ១២៩ ស្ថិតនៅក្នុងភូមិពូលូង សង្កាត់រមនា ក្រុងសែនមនោរម្យ ខេត្តមណ្ឌលគិរី ។
តាមប្រភពថា អ្នកបើករថយន្តឈ្មោះ សួន ភា ភេទប្រុស អាយុ ៣២ ឆ្នាំ ជនជាតិខ្មែរ មុខរបរជាអ្នកបើកបរ រស់នៅខេត្តព្រះវិហារ បច្ចុប្បន្នស្នាក់នៅបណ្តោះអាសន្ននភូមិពូលូង សង្កាត់រមនា ក្រុងសែនមនោរម្យ ខេត្តមណ្ឌលគិរី ពុំមានរងរបួស បើកបររថយន្តម៉ាក RUBICCON ពណ៌ ប្រផេះ ពាក់ស្លាកលេខ កម្ពុជា M.M 1818 រងការខូចខាតកង់មុខខាងឆ្វេង ។
ចំណែកភាគីម៉ូតូបើកបរដោយឈ្មោះ ត្រាញ់ ប្រិច ភេទ ប្រុស អាយុ ២៦ ឆ្នាំ ជនជាតិព្នង មុខរបរបុគ្គលិកអង្គការ WWF ផ្នែកស្រាវជ្រាវ មានទីលំនៅបច្ចុប្បន្ន ភូមិទួល ឃុំមេម៉ង ស្រុកកែវសីមា ខេត្តមណ្ឌលគិរី បើកបរម៉ូតូម៉ម៉ាកឌ្រីមសង់ពណ៌ ខ្មៅគ្មានស្លាក លេខបានស្លាប់ភ្លាមៗនៅនឹងកន្លែងកើតហេតុ ។
ក្រោយហេតុការណ៍ សមត្ថកិច្ចបានចុះវាស់វែងនិងត្រួតពិនិត្យរួចរាល់ ទើបបានប្រគល់សពឲ្យក្រុមគ្រួសារយក ទៅធ្វើបុណ្យតាមប្រពៃណី ។ រីឯរថយន្តយកមករក្សាទុកនៅស្នងការដ្ឋាននគរបាលខេត្តមណ្ឌលគិរី រង់ចាំដោះស្រាយពេលក្រោយ ៕
