ឈ្មូញឈើមុខស្រស់ចិត្តផ្លែល្វាឈ្មោះ ជុំ វុទ្ធី ហៅ ធី កាប៉ូ នៅតែបន្តសកម្មដឹកជញ្ជូនបទល្មើសព្រៃឈើយ៉ាងសកម្ម នៅស្រុកអូរគ្រៀងសែនជ័យ ពលរដ្ឋស្មើរសុំឱ្យលោកឧត្តមសេនីយ៍ត្រី សាក់ សារ៉ាង មេបញ្ជាការកងរាជអាវុធហត្ថខេត្តនិងឯកឧត្តមស្នងការខេត្តក្រចេះចុះបង្ក្រាប
ខេត្តក្រចេះ ៖ ឈ្មួញឈើមុខស្រស់ចិត្តផ្លែល្វា ឈ្មោះជុំ វុទ្ធី (ហៅធីកាប៉ូ) ក្រោយពីមានការទប់ស្កាត់មួយរយៈពេលយ៉ាងខ្លី នាពេលកន្លងទៅថ្មីៗនេះ ពេលនេះត្រូវគេឃើញមានការដឹកជញ្ជូនឈើគ្មានច្បាប់ អនុញ្ញាតសាជាថ្មី ដោយគេពុំទាន់ឃើញមានមន្ត្រីប្រដាប់អាវុធនៅក្នុងខេត្តក្រចេះ ហ៊ានចេញមុខចុះបង្ក្រាប ឈ្មួញរូបនេះនៅឡើយ។
ប្រជាពលរដ្ឋនិយាយថា កាលពីអំឡុងប៉ុន្មានខែមុននេះ ឈ្មួញឈើរូបនេះ ត្រូវបានឯកឧត្តម វ៉ា ថន អភិបាលនៃគណអភិបាលខេត្តក្រចេះ បានបញ្ជាកម្លាំងប្រដាប់វុធខេត្តចុះ ត្រួតពិនិត្យទីតាំងស្តុកឈើមួយចំនួននៅម្តុំព្រៃសហគមន៍ក្នុងឃុំរលួសស្រែជិះស្រុកអូគ្រៀងសែនជ័យនៃទឹកដីខេត្តក្រចេះ លោកបានបញ្ហាកម្លាំងប៉ូលិស និងប៉េអឹមខេត្តក្រចេះ ឱ្យតាមចាប់វត្ថុតាងឈ្មួញឈើទាំងនេះ។ តែក្រោយពីមានបទបញ្ជារបស់ឯកឧត្តម វ៉ា ថា កម្លាំងប្រដាប់ដោយអាវុធខេត្តក្រចេះ បានចាប់បានឈើរបស់ឈ្មួញ ខ្លះៗ ដែលដឹកជញ្ជូនជ្រកតាមសំយ៉ាបផ្ទះប្រជាន និងដឹកជញ្ជូនតាមគោរយន្តកែឆ្នៃជាច្រើនគ្រឿង និងបង្ក្រាបឈើបានមួយចំនួនធំទៀត ដោយប្រមូលយកទៅរក្សាទុកនៅ ស្នាក់ការមេព្រៃរលួសស្រែជិះស្រុកអូរគ្រៀងសែនជ័យយើងនេះ។
ក្រោយពីបង្ក្រាបបទល្មើសព្រៃឈើទាំងនេះ បានជាបន្តបន្ទាប់ នៅក្នុងអំឡុងខែមេសា ឆ្នាំ២០២៥នេះ ត្រូវបានគេឃើញ(លោក ធីកាប៉ូ)នៅតែមានឥទ្ធិពលខ្លាំង ជាងមន្ត្រីប្រដាប់អាវុធ មួយចំនួននៅក្នុងខេត្តក្រចេះ យើងនេះ។
បើទោះដូចច្នេះក៍ដោយ ប្រជាពលរដ្ឋ ក្នុងស្រែក្នុងអូរគ្រៀងសែនជ័យ “នៅតែមិនពេញចិត្តមុខរបរ”របស់ឈ្មួញឈើឈ្មោះ ធីកាប៉ូ រូបនេះឡើយ។ ប្រជាពលរដ្ឋជាច្រើននៅស្រុកអូរគ្រៀងសែនជ័យ បានរាយការណ៍ និងទទូចស្នើរសុំ ឱ្យលោក អ៊ូ ប៊ុណ្ណា ស្នងការខេត្ត និងលោកឧត្តម សេនីយ៍ត្រី សាក់ សារ៉ាង មេបញ្ជាការកងរាជអាវុធហត្ថខេត្តក្រចេះ ដើម្បីឱ្យលោកទាំងពីរ ជួយមានចំណាត់ការចុះបង្ក្រាបរថយន្តសាំយ៉ុងដឹកជញ្ជូនឈើដោយខុសច្បាប់ របស់លោក ជុំ វុទ្ធី ហៅធីកាប៉ូ រូបនេះ និងសំណុំពរឱ្យចាប់ខ្លួនជនល្មើសទាំងនេះ យកទៅចាត់ចែងតាមច្បាប់ផង។
លើសពីនេះពលរដ្ឋក៍បានបង្ហើបថា បទល្មើសព្រៃឈើនៅក្នុងទឹកដីអូរគ្រៀងសែនជ័យ បច្ចុប្បន្ន ដោយសារមានលោកមេព្រៃស្នាក់ការលួសឈ្មោះ តូនី បើកភ្លើងខៀវ ទើបបង្កឱ្យមានសកម្មភាពការនាំឈើខុសច្បាប់ ចេញពីឃុំរលួសស្រុកអូរគ្រៀងសែនជ័យនេះ មិនចេះចប់ មិនចេះហើយ។ ពលរដ្ឋសំណូមពរដល់ឯកឧត្តម វ៉ា ថន អៈបាលនៃគណអភិបាលខេត្តក្រចេះ សូមលោកជួយមានវិធានការជួយដុះក្តែលលោក តូនី មេព្រៃស្នាក់ការរលួស នេះផង កុំឱ្យធ្វើជាគំរូអាក្រក់ដល់មន្ត្រីជំនាញមេព្រៃផ្សេងៗទៀត៕