ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានចាត់ទុកការមកវិនិយោគទុនរបស់ ក្រុមហ៊ុនលក់រថយន្ត Great Wall Motor (GWM) របស់ប្រទេសចិន គឺបានចូលរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ចកម្ពុជា និងផ្តល់ឱកាសការងារច្រើនដល់ប្រជាជនកម្ពុជា
នេះជាការថ្លែងរបស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងឱកាសអញ្ជើញទស្សនារថយន្ត Great Wall Motor (GWM) នៅអាគារតាំងបង្ហាញរថយន្ត GWM Cambodia មានទីតាំងនៅ ផ្ទះលេខ15z, ផ្លូវលេខ៩៣ (មហាវិថីព្រះមុនីវង្ស) កែងផ្លូវលេខ៤២២ ភូមិ១៣ សង្កាត់ទន្លេបាសាក់ ខណ្ឌចំការមន រាជធានីភ្នំពេញ នារសៀលថ្ងៃទី២២ ខែឧសភា ឆ្នាំ២០២៤ ។ GWM គឺជាក្រុមហ៊ុនផលិតរថយន្ត SUV និងភីកអាប់ដ៏ល្បីល្បាញឈានមុខគេមួយនៅលើពិភពលោក។ សក្តានុពលនៃការអភិវឌ្ឍន៍យ៉ាងឆាប់រហ័សរបស់ GWM ត្រូវបានទទួលស្គាល់ជាសកល និងមានការពេញចិត្តពី អតិថិជនជាច្រើន។
ឯកឧត្តម រដ្ឋមន្ត្រី នេត្រ ភក្ត្រា បានសំដែងនូវការរីករាយដោយបានឃើញនូវ ប្រភេទរថយន្ត ថ្មីៗ ទំនើបៗ ជាច្រើនប្រភេទ របស់ក្រុមហ៊ុន Great Wall Motor (GWM) នាំយកមកពីប្រទេសចិន មកលក់នៅក្នុងទីផ្សារប្រទេសកម្ពុជា ហើយប្រភេទរថយន្តខ្លះ ប្រើប្រាស់ដោយថាមពលកកើតឡើងវិញ ដែលជាការចូលរួមចំណែកដល់ការថែរក្សាបរិស្ថាន ។ ឯកឧត្តម បានជម្រាបជូនថា បច្ចុប្បន្ននេះ កំរិតជីវភាពរស់នៅរបស់ប្រជាជនកម្ពុជា កាន់តែល្អប្រសើរ ដែលអាចមានលទ្ធភាពទិញរបស់ប្រើប្រាស់ថ្មីៗ ទំនើប និងទាន់សម័យ ។
ដូច្នេះហើយ ក្រុមហ៊ុនលក់រថយន្ត Great Wall Motor (GWM) គួរតែធ្វើការងារលើផ្នែកទំនាក់ទំនងសាធារណៈ មានកិច្ចសហការជាមួយប្រពន្ធ័ផ្សព្វផ្សាយរបស់ជាតិ ឯកជន និងសមាគមសារព័ត៌មាន នានានៅកម្ពុជា ដើម្បីធ្វើការផ្សព្វផ្សាយជាភាសាខ្មែរ ភាសាចិន និងភាសាអង់គ្លេស អោយទូលំទូលាយតាមបណ្តាញផ្សព្វផ្សាយសង្គម អោយគេបានស្គាល់ពីរថយន្តថ្មី របស់ GWM មានបច្ចេកវិទ្យាទំនើប ដែលជាប្រភេទរថយន្តមានគុណភាព ប្រើប្រាស់ធន សន្សុំសំចៃថវិកាសម្រាប់អ្នកប្រើប្រាស់ ។ ទន្ទឹមនេះ រូបរាង ការរចនារថយន្តទាំងអស់នេះឡើង គឺតម្រូវតាមចំណង់ចំណូលចិត្ត និងការចង់បានរបស់អ្នកប្រើប្រាស់ ។
តាមការបញ្ជាក់របស់តំណាងក្រុមហ៊ុនលក់រថយន្ត Great Wall Motor (GWM) បានអោយដឹងថា ដោយមើលឃើញពីការរីកចំរើនលើគ្រប់វិស័យនៅក្នុងប្រទេសកម្ពុជា ហើយប្រជាជន មានលទ្ធភាព និងមានតម្រូវការក្នុងការប្រើប្រាស់រថយន្តថ្មីៗ ទើបក្រុមហ៊ុនបាននាំចូលនូវរថយន្ត ថ្មី ទំនើប ទាន់សម័យ មានគុណភាពខ្ពស់ យកមកលក់នៅក្នុងទីផ្សារ ។ ក្រៅពីអាជីវកម្មលក់ឡាន ក្រុមហ៊ុន Great Wall Motor ដែលមានស្នាក់ការកណ្តាលនៅក្នុងទីក្រុងឌូបៃ ប្រទេសអារ៉ាប់ បានធ្វើការនាំចេញនូវផលិតផលកសិកម្មពីប្រទេសកម្ពុជា រួមមាន អង្ករក្រអូប គ្រាប់ស្វាយចន្ទី ដំណាប់ស្វាយ ដំណាប់មៀន ទៅលក់ក្នុងទីផ្សារប្រទេសអារ៉ាប់ ។
ឯកឧត្តម នេត្រ ភក្ត្រា បានគូសបញ្ជាក់ថា នៅក្នុងវិស័យកសិកម្មរបស់កម្ពុជា មានភាពល្បី ដូចជា អង្ករ ម្រេច ទុរេន ផ្លែតាងែន ចេក រួមទាំងផលិតផលកសិផលជាច្រើនទៀត ដែលបានកំពុងនាំចេញយកទៅលក់នៅទីផ្សារអន្តរជាតិ ។ ដូច្នេះការដែលក្រុមហ៊ុន GWM ធ្វើការកែឆ្នៃផលិតផលកសិកម្មរបស់ប្រជាកសិករខ្មែរ គឺជាការជួយដល់ទីផ្សាររបស់អ្នកដាំដុះកសិផលបានយ៉ាងច្រើន និងបានផ្តល់នូវចំណេះដឹង ជំនាញដល់បងប្អូនប្រជាកសិករខ្មែរ បានយល់ដឹងពីបច្ចេកវិទ្យា ការកែឆ្នៃ ការវេចខ្ចប់រាល់ផ្លែឈើ និងអង្ករ ដើម្បីនាំចេញទៅលក់នៅទីផ្សារក្រៅប្រទេស ។
ឯកឧត្តម រដ្ឋមន្ត្រី បានសំដែងនូវមោទនភាពដែលបានឃើញមានរូបទង់ជាតិ កម្ពុជា បានដាក់នៅលើកញ្ចប់ផលិតផលខ្មែរ យកទៅដាក់លក់នៅទីផ្សារបរទេស ហើយគេបានផ្តល់តំលៃពីគុណភាពល្អ មានរសជាតិឆ្ងាញ់ ដែលអាចបង្កើតទីផ្សារកាន់តែច្រើនបន្ថែមទៀត ។
ឆ្លៀតក្នុងឱកាសនេះដែរ ឯកឧត្តម រដ្ឋមន្ត្រី នេត្រ ភក្ត្រា បានស្នើដល់ក្រុមហ៊ុន GWM ជួយពង្រីកទីផ្សារអោយបានកាន់តែទូលំទូលាយបន្ថែមទៀត ដើម្បីចូលរួមកែឆ្នៃ វិចខ្ចប់ នូវផលិតផលរបស់ខ្មែរអោយបានកាន់តែច្រើនបន្ថែមទៀត ។ ជាការឆ្លើយតប ក្រុមហ៊ុន នឹងខិតខំប្រឹងប្រែងពង្រឹកទីផ្សារលក់ផលិតផលរបស់កម្ពុជា នៅកាន់ទីផ្សារអន្តរជាតិ បានកាន់តែច្រើនបន្ថែមទៀត ។
តមកនៅថ្ងៃដដែលនេះដែរ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានអញ្ជើញទៅទស្សនកិច្ច ទីស្នាក់ការក្រុមហ៊ុន OneRoad Group ស្ថិតនៅខណ្ឌឬស្សីកែវ រាជធានីភ្នំពេញ ដោយមានការទទួលស្វាគមន៍ពី លោក Kevin Lou នាយកប្រតិបត្តិ និងជាស្ថានិក ក្រុមហ៊ុន One Road Group ព្រមទាំងជាប្រធាន អង្គការមូលនិធិសប្បុរសធម៌ វ័នរ៉ូដ ។
ក្រុមហ៊ុន OneRoad Group (Cambodia) Co., Ltd. ដែល ជាក្រុមហ៊ុន វិនិយោគ លើ ការ កែច្នៃ កសិផល កម្ពុជា សម្រាប់ ការ នាំចេញ និងតាំងយានយន្តដែលអាចមានសមត្ថភាពក្លាយជារោងចក្រដំឡេីងគ្រឿងបង្គុំឡាននាពេលអនាគត ។បន្ទាប់ពីជួបពិភាក្សាគ្នា និងទស្សនកិច្ចទីតាំងមួយចំនួនរបស់ក្រុមហ៊ុន និងពិនិត្យមើលរថយន្ត Great Wall Motor (GWM) ជាច្រើនគ្រឿងដាក់តាំងបង្ហាញរួចមក លោក Kevin Lou នាយកប្រតិបត្តិ និងជាស្ថានិកក្រុមហ៊ុន One Road Group ព្រមទាំងជាប្រធាន អង្គការមូលនិធិសប្បុរសធម៌ វ័នរ៉ូដ បានផ្តល់នូវអំណោយជូន ដល់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន រួមមាន កាតាប កូនសិស្សចំនួនជាង ១ ០០០ ដោយក្នុងកាតាប នីមួយៗ មានបន្ថែមជាសំភារៈសិក្សាជាង ១០ មុខ រួមទាំងដបដាក់ទឹកផងដែរ ។
ឯកឧត្តម រដ្ឋមន្ត្រី នេត្រ ភក្ត្រា បានសំដែងនូវការអរគុណដល់ ក្រុមហ៊ុន One Road Group ដែលបានផ្តល់នូវសំភារៈសិក្សាជាច្រើនមុខ រួមទាំងកាតាប និងដបដាក់ទឹក ហើយអំណោយទាំងនេះ នឹងយកទៅចែកជូនដល់កូនៗរបស់មន្ត្រីរាជការនៃក្រសួងព័ត៌មាន ដើម្បីចូលរួមអបអរសាទរទិវាកុមារអន្តរជាតិ ១ មិថុនា ខាងមុខនេះ ហើយក៏យកទៅចែកជូនដល់កុមារនៅតាមជនបទក្នុងខេត្តក្រចេះ ។
គួររំលឹកដែរថា កាលពីថ្ងៃទី១០ ខែមេសា ឆ្នាំ២០២៤ ក្រុមហ៊ុន One Road Group នាំយកអំណោយអង្ករ ចំនួន ២តោន ជូនដល់ក្រសួង សម្រាប់ចូលរួមបម្រើដល់ការងារមនុស្សធម៌ និងសកម្មភាពនានា របស់ក្រសួងព័ត៌មាន ៕
