សហរដ្ឋអាមេរិក និងកូរ៉េខាងត្បូង បានបង្កើតក្រុមការងារ ដើម្បីទប់ស្កាត់ការដឹកជញ្ជូនប្រេងរបស់កូរ៉េខាងជើង
Reuters៖ នៅសប្តាហ៍នេះ សហរដ្ឋអាមេរិក និងកូរ៉េខាងត្បូង បានចាប់ផ្តើមក្រុមការងារថ្មីមួយ ក្នុងគោលបំណងការពារប្រទេសកូរ៉េខាងជើង ពីការទិញប្រេងខុសច្បាប់ ខណៈដែលការជាប់គាំងនៅក្រុមប្រឹក្សាសន្តិសុខអង្គការសហប្រជាជាតិ ធ្វើឲ្យមានការសង្ស័យលើអនាគតនៃទណ្ឌកម្មអន្តរជាតិ។
កាលពីថ្ងៃអង្គារ កិច្ចប្រជុំលើកដំបូងនៃក្រុមការងារពង្រឹងការការពារ (EDTF) ត្រូវបានធ្វើឡើងនៅទីក្រុង
វ៉ាស៊ីនតោន។
នៅក្នុងសេចក្តីថ្លែងការណ៍មួយ ក្រសួងការបរទេសកូរ៉េខាងត្បូងបាននិយាយថា កិច្ចប្រជុំនេះមានការចូលរួមពីមន្ត្រីជាង ៣០នាក់មកពីក្រសួង និងទីភ្នាក់ងារទទួលបន្ទុកការទូត ចារកម្ម ការដាក់ទណ្ឌកម្ម និងការរារាំងដែនសមុទ្រ។
សេចក្តីថ្លែងការណ៍បានបន្ថែមថា ភាគីទាំងពីរបានសម្តែងការព្រួយបារម្ភចំពោះលទ្ធភាពនៃការផ្តល់ប្រេងចម្រាញ់របស់រុស្សីដល់កូរ៉េខាងជើង និងបានពិភាក្សាអំពីវិធីដើម្បីផ្អាកកិច្ចសហប្រតិបត្តិការខុសច្បាប់រវាង
ទីក្រុងម៉ូស្គូ និងទីក្រុងព្យុងយ៉ាង។
សេចក្តីថ្លែងការណ៍បាននិយាយថា “ប្រេងគឺជាធនធានដ៏សំខាន់សម្រាប់ការអភិវឌ្ឍនុយក្លេអ៊ែ និងកាំជ្រួចរបស់កូរ៉េខាងជើង និងផលប្រយោជន៍យោធា”៕