ឯកឧត្តម សុខ ប្រសិទ្ធិ រដ្ឋលេខាធិការក្រសួងព័ត៌មាន អញ្ជើញដឹកនាំកិច្ចប្រជុំសម្ព័ន្ធសិទ្ធិទទួលព័ត៌មានអាស៊ី (AAIA) តាមប្រព័ន្ធអនឡាញ
ភ្នំពេញ៖ ឯកឧត្តម សុខ ប្រសិទ្ធិ រដ្ឋលេខាធិការក្រសួងព័ត៌មាន អញ្ជើញដឹកនាំកិច្ចប្រជុំសម្ព័ន្ធសិទ្ធិទទួលព័ត៌មានអាស៊ី (AAIA) តាមប្រព័ន្ធអនឡាញ
ឯកឧត្តម សុខ ប្រសិទ្ធិ រដ្ឋលេខាធិការក្រសួងព័ត៌មាន អញ្ជើញដឹកនាំកិច្ចប្រជុំសម្ព័ន្ធសិទ្ធិទទួលព័ត៌មានអាស៊ី (AAIA) តាមប្រព័ន្ធអនឡាញ នៅរសៀលថ្ងៃទី១២ ខែមីនា ឆ្នាំ២០២៤ នាសាលប្រជុំព្រះវិហារ ទីស្តីការក្រសួងព័ត៌មាន
កិច្ចប្រជុំនាឱកាសនេះក៏មានការចូលរួមពី ដោយឯកឧត្តម អនុរដ្ឋលេខាធិការ និងតំណាងអគ្គនាយកដ្ឋានទាំង៥ នៃក្រសួងព័ត៌មាន ។ សម្រាប់កិច្ចលើកទី១ របស់សម្ព័ន្ធសិទ្ធិទទួលព័ត៌មានអាស៊ី ក្រោមប្រធានបទ “ ការអនុវត្តល្អបំផុត និងបញ្ហាប្រឈមក្នុងការធានា សិទ្ធិទទួលព័ត៌មាន (យុទ្ធនាការអភិវឌ្ឍន៍ព័ត៌មាន ការទំនាក់ទំនង និងសមត្ថភាព) “
ឯកឧត្តម អំ តារាវិទូ អនុរដ្ឋលេខាធិការ ក្រសួងព័ត៌មាន បានធ្វើបទបង្ហាញលើប្រធានបទ “ការអនុវត្តរបស់កម្ពុជា សម្រាប់យុទ្ធនាការអភិវឌ្ឍព័ត៌មាន ទំនាក់ទំនង និងកសាងសមត្ថភាព” ដោយផ្តោតលើចំណុចសំខាន់ចំនួន ៦ ដែលត្រូវបានកំណត់ដោយលេខាធិការដ្ឋាននៃ AAIA រួមមាន៖ (១) ការធានាសិទ្ធិទទួលបានព័ត៌មាននៅកម្ពុជា និងវិធីសាស្ត្រនៃយុទ្ធនាការ
២/ការធានាសិទ្ធិទទួលព័ត៌មាន
៣/ បញ្ហាប្រឈមក្នុងការផ្សព្វផ្សាយព័ត៌មាន និងការកសាងសមត្ថភាព
៤/គន្លឹះជោគជ័យនៃយុទ្ធនាការ
៥/បុគ្គលគោលដៅសម្រាប់យុទ្ធនាការ
៦/បទដ្ឋានក្នុងស្រុក និងកត្តាវប្បធម៌។
កិច្ចប្រជុំបានធ្វើការពិភាក្សា និងផ្លាស់ប្តូរទស្សនៈ និងយោបល់ ក្នុងការលើកកម្ពស់ និងការធានាបានសិទ្ធិទទួលព័ត៌មាននៅក្នុងប្រទេសនីមួយៗ និងតំបន់។
ឯកឧត្តម សុខ ប្រសិទ្ធិ បានបញ្ជាក់អំពីគោលនយោបាយរបស់រាជរដ្ឋាភិបាល ក្នុងការធានាបាន នូវការ អនុវត្តសិទ្ធិទទួលព័ត៌មានស្របទៅតាមច្បាប់ និងលិខិតបទដ្ឋានគតិយុត្តិជាធរមាន។
ឯកឧត្តម បានលើកបញ្ជាក់អំពីការរីកចម្រើនយ៉ាងឆាប់រហ័សអំពីបច្ចេកវិទ្យាក្នុងវិស័យព័ត៌មាន និងផ្សព្វផ្សាយ ដែលបានចូលរួមចំណែកយ៉ាងសំខាន់ក្នុងការអនុវត្តសិទ្ធិទទួលព័ត៌មាននៅកម្ពុជា និងបញ្ហាប្រឈម នៃព័ត៌មានមិនពិត ដែលបានធ្វើឱ្យប៉ះពាល់គុណភាពព័ត៌មានចំពោះប្រជាពលរដ្ឋ។
ទន្ទឹមនឹងនេះ ឯកឧត្តម ក៏បានលើកបង្ហាញអំពីកិច្ចខិតខំប្រឹងប្រែងរបស់ក្រសួងព័ត៌មាន ក្នុងនាមជាសេនាធិការរបស់រាជរដ្ឋាភិបាល លើការជំរុញ និងលើកកម្ពស់សិទ្ធិទទួលព័ត៌មាន ក្នុងនោះការរៀបចំសេចក្តីព្រាងច្បាប់ ស្តីពីសិទ្ធិទទួលព័ត៌មាន និងយកចិត្តទុកដាក់អនុវត្តការងារប្រកបដោយស្មារតីទទួលខុសត្រូវ ដោយបានផ្តោតលើការពង្រឹង និងពង្រីកវិសាលភាពនៃការផ្សព្វផ្សាយឱ្យកាន់តែទូលំទូលាយតាមរយៈ យន្តការប្រព័ន្ធផ្សព្វផ្សាយបុរាណ និងប្រព័ន្ធផ្សព្វផ្សាយទំនើបជាតិ និងឯកជន ក្នុងគោលបំណង ផ្តល់នូវឱកាស និងលទ្ធភាពពេញលេញជូនដល់ប្រជាពលរដ្ឋនៅគ្រប់ទិសទី ដើម្បីទទួលបាន ព័ត៌មានពិតតាមតម្រូវការ និង ទាន់ហេតុការណ៍ ក្រោមទម្រង់ “ប្លែក លឿន ទុកចិត្តបាន ពេលណា ទីណាក៏បាន”។
គួរបញ្ជាក់ដែរថា សម្ព័ន្ធសិទ្ធិទទួលព័ត៌មានអាស៊ី ត្រូវបានបង្កើតឡើងនៅថ្ងៃទី២៩ ខែកញ្ញា ឆ្នាំ២០២២ ដែល មានសហស្ថាបនិកគឺប្រទេសកម្ពុជា អ៊ីស្រាអែល ម៉ាល់ឌីវ ស្រីលង្កា ហ្វីលីពីន និងដែនកោះតៃវ៉ាន់ ដោយចុះហត្ថលេខាលើសេចក្តីប្រកាសរួមនៃកិច្ចសហប្រតិបត្តិការដែលបង្កើតជាផ្លូវការនូវសម្ព័ន្ធសិទ្ធិទទួលបានព័ត៌មានអាស៊ី (AAIA) ដែលជាសម្ព័ន្ធមិត្តដំបូងនៅក្នុងអាស៊ី និងបង្កើតឡើង នៅលើគោលការណ៍នៃសាមគ្គីភាពការផ្លាស់ប្តូរចំណេះដឹង និងកិច្ចសហប្រតិបត្តិការជាយុទ្ធសាស្ត្រក្នុងវិស័យសិទ្ធិទទួលព័ត៌មាន។
សមាជិកស្ថាបនិក AAIA បានជួបប្រជុំគ្នាជាលើកដំបូងកាលពីខែមិថុនា ឆ្នាំ២០២៣ ក្នុងអំឡុងពេលនៃសន្និសីទ អន្តរជាតិនៃស្នងការព័ត៌មាន (ICIC) ប្រចាំឆ្នាំលើកទី១៤ ដើម្បីផ្តល់មតិយោបល់ចុងក្រោយ លើធាតុចូលចំពោះធម្ម នុញ្ញ AAIA ដោយបានឯកភាពក្នុងការបង្កើតវេទិកាជាស៊េរី AAIA ឡើងក្នុងការសម្របសម្រួលកិច្ចសន្ទនាបើកចំហ កិច្ចសហប្រតិបត្តិការ និងមានគោលបំណង ស្វែងរកទិដ្ឋភាពសំខាន់ៗដែលជំរុញឱ្យមានការជឿនលឿននៃការសិទ្ធិទទួលព័ត៌មាននៅក្នុងដែនសមត្ថកិច្ចរៀងៗខ្លួន ៕
